ائروتیزمین یاتاغی شعردیر

ائروتیزمین یاتاغی شعردیر

   

   

   

  -         بیزیم دیلده ائروتیزم آلینمیر دئینلر وار. بو حاقدا عئینی فیکیرده سینیزمی؟ 

   

  -        ائروتیزم اینسانین ان اسکی دویغولاریندان و دیلکلریندن بیریدیر. حیات دویقولارینی ان چوخ ائروتیزم اؤزونده باریندیرماقدادیر. بوتون دیللرده، او جومله دن بیزیم دیلده ده چوخ گؤزل ایفاده واریانتلاری واردیر. سادجه تابولار و فردیته قارشی تؤره لر بو دویومون شعره یانسیماسینی انگلله میش. بونون اوچون شعر صنعتی نین درینلیگینه ائنمک لازیمدیر. شعر و اینسانین ائروتیک دویغولاری حاققیندا ائستئتیک بیلگی و ائلم صاحیبی اولماق گرکدیر. بو بیلگیلی اولما مثله سینی ان گؤزل شکلی ایله فوضولی آچیقلامیشدیر: 

  “علمسیز شعر اساسسیز دیوار اولور، 

  اساسسیز دیوار غایتده بی اعتیبار اولور.” 

  شعر صنعتی نین قایناغی خیال، دویغولار و دوشونجه لر ایکن، ایفاده آراجی دیلده کی  سؤزلردیر. خیالین، دویقولارین، قیسمن ده دوشونجه لرین موسیقی ایله ایفاده اولونماسی.    

   

  -      ائروتیک بیان هر زامان اعتیراضلا قارشیلاشمیشدیر، چوخ آز دیللرده بونا مئیدان آچیلمیشدیر.  

   

  -      هیستوریولوقلار (مورخلر) بشرین یازی تاریخی نین سومئرلرله باشلادیغی قناعتینده لر. سومئرلردن بری ائروتیزم ادبییاتین مؤوزوسو اولموشدور. سومئرلردن قالان چوخ اؤنملی کیتاب “قیلقامیش” اثریدیر. اثرده ائنکیدو آدیندا وحشی و گوجلو بیر اینسان وار. اور شهری نین اوزاق تارلالاریندا چوبانلاری اینجیدیر، قویونلاری، ماللاری آپاریب یئییر. اور شهری نین پادشاهی قیلقامیشا بو خبری چاتدیریرلار. قیلقامیش “تاپیناق فاحیشه لریندن بیرینی آپاریب ممه لرینی اونا گؤسترین، اهلیله شر” دئییر.  

   

  -      ندن فاحیشه لرین؟ 

   

  -      چونکو سومئرلر زامایندا قادینلار اوچون فاحیشه لیک دینی بیر مرتبه و شرف ساییلیردی. هر قادینین فاحیشه لیک ائتمه حاققی یوخ ایدی، یالنیز اخلاقلی قادینلار آللاه یولوندا فاحیشه لیک ائده رک گوناهلاردان آریناردیلار. هیجاب دا ایلک اولاراق سومئرلرده اورتایا چیخمیش. سومئرلرده، آنجاق فاحیشه قادینلارین فاحیشه لیک مودتی ایچینده هیجاب تاخما حاقلاری وار ایدی. هیجاب دینی رمز اولاراق فاحیشه قادینلارا خاص ایدی. بو اوزدن قیلقامیش، داها اخلاقلی قادی نین ممه لری نین ائنکیدویا گؤستریلمه سینی ایسته ییر. ائنکیدو فاحیشه قادی نین ممه لرینه توخوندوقدان سونرا اهلیلشیب شهره گیریر، ائروتیزمین ده اساسیندا توخونوش دورماقدادیر. اثرده وحشی بیر اینسانی قادین ممه لری اهلیلشدیریر و ائنکیدو کیمی گوجلو، آنجاق وحشی اینسان قادین ممه لرینه توخونمانین لذتی قارشیسیندا مغلوب اولور، اهلیلشه رک شهر حیاتینا باشلاییر.  

   

  -      ائروتیزمین بیزیم دیلیمیزده قارشیلیغی نئجه اولا بیلر؟ 

   

  -      بیزیم دیلیمیزده بونون قارشیلیغی اولمامیشدیر و یوخدور، لاکین ائروتیک حالی آنلادان ادبی نومونه لریمیز وار. ائروتیک سؤزونون کؤکو عئروس کلمه سیدیر. اسکی یوناندا عئروس، سئوگی و شهوت تانریسیدیر. عرب دیلینه ده بو سؤز تاثیر ائده رک “عروس” سؤزو دوزلمیش. عربجه دن ده فارسجایا و تورکجه یه کئچمیش. عروس، یعنی گلین. گلین کیمدیر؟ گلین ائروتیک دویغولاری جوشدوران قادیندیر. مثلن مؤولانا طریقتینده “شبی-عروس” دئیه بیر آنلاییش وار. یعنی گلین گئجه سی. عروس بیر ائرکک طرفیندن توخونوش دویغولارینی هیجانلاندیران قادیندیر. ائروتیزم بوتون داورانیشلاریمیزدا، ایلیشکیلریمیزده، دونیایا و حیاتا باخیشیمیزدا اؤزوموز فرقینده اولمادان اورتایا چیخار. حتّی دینی کیتابلارین چکیجی اولماسی نین سببلریندن بیری ده ائروتیک حیسسلری اؤز ایچینده باریندیرماسیدیر. هوری و قیلمانین نه اولدوغونو بیلمیریک. لاکین هوری ائرککلر و قیلمان قادینلار اوچن ائروتیک دویقولار چاغریشدیرار. اینسانی موکممل اولاراق یارادان آللاه اونون ائروتیک احتییاجلارینا دا خیتاب ائتمه دن وهی گؤندرمزدی. دین کیتابیمیزدا سادجه ائروتیزم دئییل سئکس حاققیندا دا بیلگی وار. سئکس قونوسوندا دا قوران اینسانلاری ائییتر.  

   

  -      بئله آنلاشیلیر کی، ائروتیزم اینسانین طبیعی ایستکلریندن بیریدیر؟ 

   

  -      عومومن خیال دونیاسی ایله گئرچکلیک آراسیندا اویغونلوق اولماز. اورتاداکی اویغونسوزلوق اوچورومونو اینسان اؤز خیاللاری و فانتاستیکالاری ایله دولدورماغا چالیشار. صنعتده بو زامان یارانار. بو زامان بیز فرقینده اولماساق دا، ائروتیک ایستکلر دونیامیزی سوسلر. بو سورج فرقینده لیگین نتیجه سی دئییل، فرقینده سیزلیگین یاشانتیسیدیر. اینسان اؤز حیاتینی بوتونویله فرقینده لیک اوزرینده یاشاماز، یاشایا بیلمز. حیاتیمیزین چوخ حیصه سی فرقینده سیزلیگین نتیجه سیدیر. خطالار، بدبختلیکلر و خوشبختلیکلر، شانس و تسادوفلر ده بو آنلامدا معنا داشییار. آغلا گلمه یهن باشا گه لر. ائروتیزم بو زامانلار بیزیم تنهالیغیمیزی سوسلر، دئپرئسیونا گیرمه میزی انگللر. ائروتیک دویغولارینی صنعتده بیان ائتمکده عاجیز اولان توپلوم عوضولری نین چوخونون دئپرئسیونا اوغرادیغی گؤرونموشدور. خسته حال اولارلار. لاکین ائروتیزم ده دیگر ساحه لر کیمی ائییتیم و کولتور گرکدیرر. ائییتیملی بیر اینسانلا ائییتیمسیز اینسانین ائروتیک خیاللاری دا فرقلی اولمالیدیر. قادی نین داش-قالاق ائدیلدیگی اؤلکهلرده نه سئوگی، نه ده ائروتیزم کیمی اینجه دویغولار اوزرینه دوغرو بیلگی الده ائتمک اولار 

   

  -      ائروتیزم ان چوخ هانسی صنعت نؤوعونده اؤزونو ایفاده ائده بیلر. 

   

  -      ائروتیزم بیر کیشی نین دونیانی دیشی، بیر قادی نین دا حیاتی ائرکک اولاراق گؤرمه اینستینکتیندن مئیدانا چیخار. شعر ائروتیزمین یاتاغیدیر. شعرده نسنه لر دیشیلشر. بیزیم دیلیمیزده نسنه لرین جینسیتی یوخدور. عرب و ایتالییان دیلینده اولدوغو کیمی بعضی دیللرده نسنه لرین بیر چوخو دیشی و یا ائرکک اؤزللیکلری ایله نیتلنرلر. نسنه لره جینسیت تانیمایان دیللرده شعر یاردیما گه لر و نسنه نی دویغو و قاوراما سورجینده جینسیتلشدیرر. حیاتدا و وارلیقدا ائرکگین دیشیلیک و قادی نین ائرککلیک آراماسی شعره یانسییار. ان چوخ شعر صنعتینده ائروتیزم اؤزونو بیان ائدر. داها دوغروسو قولاق ائروتیزمی موسیقیده، گؤز ائروتیزمی رسساملیقدا و گؤرونور اشیالاردا، ال ائروتیزمی توخونوشدا، بورون ائروتیزمی خوش قوخولاردا اؤزونو ایفاده ائدر. اینسانلارین، او جومله دن پئیقمبریمیزین ده عطیر قوللانماسی چئوره ده سئویملی و خوش ائروتیک باخیش اوفوقو اولوشدورماغا خیدمت ائتمیشدیر. لاکین بونلارین هامیسی شعرده وحدت حالینا گه لر. چونکو شعرده هم موسیقی، هم گؤرمه، هم دینله مه، هم ده سؤزلرله سیرلی و خفیف بیچیمده توخونوش دویغولاری گیزلیدیر. خیال دونیامیزین آرخاسینجا اولدوغو دیشی نسنه لری شعرده تاپاریق. بو دا کیشیلری راحاتلادار. عئینی ایله ده قادینلاردا دا ترسینه. شعرله نظمین ده فرقی بورادا اورترایا چیخار. نظمده شوورالتی نین فعالیتی یوخدور. رئالیست عاغلین فعالیتی وار. مثلن م. ه. سابیر شاعیر دئییل منجه، ناظیمدیر. چونکو اونون اثرینده شعردن اثر-علامت یوخدور. سوسیال رئاللیق اولدوغو کیمی بوتون چیرکینلیکلری ایله تصویر ائدیلیر. حتّی شعر آرایان آدامین سابیرین شعرلرینی اوخوماغا هوه سی اولماز. کوللئکتیو پروبلئملئری بیان ائدر، فردیتدن اثر یوخدور. چونکو اورادا مورککب شعر و حیات دویغوسوندان اثر یوخ. سئویمسیز تصویرلردیر. شعرده اساسن شوورالتی اؤز گله جگینی بللی ائتمک اوچون فعالیت گؤسترر. شوورالتیندا یاساق دئیه بیر شئی یوخدور. شووالتیمیزی کونترول ائتمک اوچون عاغلیمیزی قوللاناریق. شعر بو کونترولو اورتادان قالدیرماغا چالیشار. شعر، منجه شوورالتیندان بیر شئیلری شوورون آنلایا بیله جگی ساحه یه داشییاراق متنلشدیرمه فعالیتیدیر.  

   

  -      ندن صیرف شعر صنعتی بو ساحه ده اؤنده اولور؟ 

   

  -      اونا گؤره کی، سؤز صنعتی قدر اینسان روحونا تاثیر ائدن ایکینجی عامیل یوخدور. توخونوشو ائروتیزمین عملی اولاراق قبول ائدرسک، شعری اونون نظریییه سی کیمی دوشونمک اولار. حتّی سؤزلرله توخونوش داها دیکسیندیریجی و تاثیرلی اولور. بیر کیشی، یا دا بیر قادین قارشی طرفدن “سنی سئویرم” سؤزونو دویدوغوندا یاشادیغی موتلو روح حالی بیان ائدیلمزدیر. هله بو قارشیلیقلی اولدوغوندا داها دا اوستون روح حاللاری یاشانار. بو، سؤزلرله قادین و کیشی نین بیر-بیرلری نین روحلارینا قونماسی، سؤزلرله توخونوشدان عیبارتدیر. سؤزلر قدر گوجلندیریجی و گوجسوزلشدیریجی ایکینجی بیر دوروم یوخدور. دیگر طرفدن شعر، سادجه سؤزدن عیبارت دئییل. شعر سؤزلرین ائستئتیک هؤرولمه سی و موسیقی دیلی ایله بیان ائدیلمه سیدیر. شعرده سؤزلر اؤز مئلودییاسینی (آهنگینی) کشف ائده رک دانس ائتمه یه باشلار. بو اوزدن شعری سؤزلرین دانس مئیدانی کیمی آنلایا بیلریک. نثرده دانس یوخدور، نثرده کی  حرکت باشقادیر. فرانسیز ادبیاتشوناس پول والئری بو حاقدا ماراقلی فیکیر بیان ائدر. او دئییر کی، شعر دانسا و نثر یورومه یه بنزر. هر ایکیسی ده حرکتدیر. لاکین دانسین بیر یئره وارماق کیمی آماجی اولماز، دانس ذؤوق و روحو حرکتلندیرمک اوچون گئنیشله مه ین بیر مکاندا مئیدانا چیخار. آنجاق یورومه نین بیر آماجی وار، بیر یئردن باشقا یئره واریلار. هم نثر، هم ده شعر حرکتیدیر. بیری نین آماجی وار، دیگری نین یوخدور. بو آچیدان والئری شعری دانسا و نثری یورومه یه بنزه در. آما بورادا دانس ندیر سوالی اورتایا چیخار. 

   

  -      ندیر دانس؟ 

   

  -      دانس (رقص) سادجه موتلولوق ایجاد ائتمک صنعتی دئییل، منجه دانس ائروتیزم ایجاد ائتمه صنعتیدیر. چونکو هر بیر موتلولوغون اساسیندا ائروتیک دویغولار دا دایانار. دانسدا بدن اؤز گؤرونتولرینی دییشه رک ائروتیک گؤرونتو سرگیلر. مثلن بالئت بوتونویله ائروتیک دانسدان عیبارتدیر. شعر اؤز دوغاسیندا رقص باریندیردیغی اوچون دانسین سرگیله مه یه چالیشدیغی ائروتیزمی اؤز وارلیغینا یوکلر. رقص ائروتیزمین سرگیلنمه سی و شعر ده بیلگیسیدیر.  

   

  -      ائروتیزم غئیری-شووریلیگین فعالیتیدیر دئدینیز، بونو بیر آز داها آچیقلایین... 

   

  -      ینسان حیاتی، سادجه اویانیقکن کئچیردیگی یاشانتیدان عیبارت دئییلدیر. حیاتیمیزین ان آز اوچده ایکیسی یوخودا کئچر. یوخو حیاتیمیزدا دا ائروتیزم بیزی ترک ائتمز. چونکو سئویشمک و ائروتیزم کیمی دویغولار اینسان دوغاسی نین اؤزللیکلریندن ساییلار و بیز یوخودا اؤز دوغامیزدان آیریلمیریق، تام ترسینه دوغامیزین ایسته دیگی کیمی یاشاییریق، چونکو یوخو دونیاسیندا اینسان هئچ بیر تابو و تؤره انگللری ایله قارشیلاشمادان موطلق آزادلیق اؤلچولری ایله یاشار. یوخو دونیامیزدا بئیینیمیزین بیزه معلوم اولمایان قاتلاری اویانار. اورادا آرزو ائتدیگیمیز شعرلری یاشاریق، یوخو دونیاسی بیر ده شعرین متنلشمه سی دئییل، یاشانما یئریدیر. آجی، موتلو، موتسوز دویغولار یاشانتی اولاراق ایچیمیزده بیلمه دیگیمیز بیر یئرلرده حرکتلنر. حتّی گؤی اوزونده اوچدوقلاریمیز دا اولار. هر کسین یوخو تاریخی وار. هامیسینی خاطیرلایاماز، آنجاق یوخولارین دا بیلمه دیگیمیز بیر تاریخی و آردیجیللیغی وار. گئرچک حیاتدا بیز سادجه موثبت زامان ایستیقامتینده یاشایاریق. لاکین قوراندا یازیر کی، آللاه هر شئیی جوت یاراتمیش و بیر اولان آنجاق آللاهدیر. دئمک زامان دا رییازیاتدا اولدوغو کیمی، منفی و موثبت اولاراق جوتلوکدن عیبارتدیر. لاکین بیز منفی زامانی، آنجاق یوخودا یاشایا بیلریک. یوخودا بیزدن یوز و یا مین ایللر اؤنجه اولان قادینلارلا قارشیلاشار، اونلارلا بزن ده سئویشریک. تانیمادیغیمیز و حیاتدا هئچ بیر زامان قارشیلاشمایاجاغیمیز حادیثه لری، قادینلاری گؤرر، اونلارلا ائروتیک ماجرالار یاشاریق. قادینلار دا بو شکیلده دیر. بو، ائروتیک دویغولارین بیزیم اینستینکتیو وارلیغیمیزین بیر پارچاسی اولماسی اوزوندندیر. یوخوموزدا عاغیلین بیزه معلوم اولان قاتی یاتدیغی اوچون، یا دا بیزیم تانیدیغیمیز و گئرچک حیاتدا فال اولان عاغیل یاتدیغی اوچون صیرف اینستینکتلر بیزی یؤنلندیرر.  

   

  -      ماراقلیدیر، یوخولاردا دا دئمک... 

   

  -      یوخولاردا اوزونو گؤرمه دیگیمیز بیر شخص وار. او، بوتون یوخولاریمیزدا وار، آنجاق اونو یادیمیزدا ساخلایا بیلمریک. بلکه ده او، بیزیم ایچیمیزده کی  ائرککلیگیمیزین تاماملاییجیسی اولان دیشیلیگیمیزدیر. یعنی بلکه ده اوزونو هئچ بیر زامان گؤرمه دیگیمیز، آنجاق بوتون یوخولاریمیزدا اولان او گؤرونتو تانری نین اؤزودور. اورادا بیزیم یوخوداکی حیاتیمیزدا او دا، او اوزونو گؤرمه دیگیمیز و گؤره بیلمیه جگیمیز هر شئیی بیلن شخص ده آکتیودیر. یا دا سانکی یوخودا بوتون باشیمیزا گلنلری او پلانلاییر. حتّی یوخونو گؤردویوموزده نه لری یاشایاجاغیمیزی بیلمیریک، لاکین نه لری یاشایاجاغیمیزی اونون اؤنجه دن بیلدیگینی بیلیریک. او، گرکدیگینده اؤنوموزه بیر قادین چیخاراراق اونونلا ائروتیک ایلیشکیلر یاشامامیزا ایمکان یارادیر. لاکین یوخودا بیر ده تانیدیغیمیز بیر قادین وار. عادتن هر کسین بیرینی سئویب و اونون اوچون یاخیلدیغی بیری اولار. بو سئوگی اینسانین روحوندا بیر یانیق یاراسی آچارسا، یوخوداکی ائروتیک ایلیشکیلر و ائروتیک صؤحبتلرده او قیزی چوخ گؤرریک. 50 یاشلاردا دا او یانیق یئری اونودولماز و رؤیالاردا یئنیدن فاللاشار.  

   

  -      بو سؤیله دیکلرینیزین علمی آچیقلاماسی ایله بیر یئرده قارشیلاشدینیزمی؟ 

   

  -      ونلو جراح پسیخولوق یونق بونو آنیما و آنیموس قاوراملاری ایله آچیقلار. آنیما و یا خیالی قادین کیشی نین شوورالتیندا وارلیغی قادین کیمی سئزمه دورومو ایکن، آنیموس و یا خیالی ائرکک ده قادی نین دوغاسیندا وارلیغی کیشی کیمی سئزمه فعالیتیدیر. یعنی کیشی نین چوخ بؤیوک بیر حیصه سی ائرکک ایکن، اونون ایچینده کیچیک بیر بؤلوم ده قادیندیر. قادینلاردا دا بونون ترسینه. بو کیچیک بؤلوم شوورالتیندا یئرلشیر. بیز اونون فرقینده اولماساق دا، داورانیشلاردا اؤزونو گؤسترر. قادیندان خوشلانما دا او کیچیک بؤلومون گئنیشله مه فعالیتی کیمی اؤنوموزه چیخار. قادینلاردا دا ترسینه. آنیما و آنیموس یوخولاردا، خیاللاردا، صنعت اثرلرینده و اؤزللیکلله شعرده وارلیغینی گؤسترر. یونق بونو اینسانین ان اسکی آرخئتیپی اولاراق تانیملار. هر کیشی اؤز ایچینده ازه لی بیر قادین و هر قادین دا اؤز ایچینده ازه لی بیر کیشی تصویری و تصوورو داشیماقدادیر. بو تصویر هانسیسا بیر قادین دئییل، سئودیکدن، سئودیگینله ائولندیکدن سونرا دا بو تصویر اینسان دوغاسینی ترک ائتمز. بو، ایرسی بیر خاطیره اولاراق کیشی و قادی نین حیات سیستئمی ایچینده یئرلشدیریلمیشدیر. بو سیستئمین چؤکوشو ایله پسیخولوژیک سورونلار اورتایا چیخار و اینسان درین دئپرئسیونا اوغرار. آنیما بیلینن یؤنه دوغرو فعالیت گؤسترمز. چونکو بیلگی بئیی نین و ووجودون بللی طرفیدیر. آنیما و آنیموس بیلینمه یهن قارانلیقلارا طرف سوروکلنر. بیلینمه یهن ذؤوقلری، بیلینمه یهن بدبختلیکلر و آجیلاری آرار. حیاتداکی فاجیعه لرین و یا ائروتیک سیچرامالارین دا سببی بودور. بو اوزدن ائروتیک آچیلیم سیرلی یوللارلا یا سینیرلانمیش، یا دا یاساقلانمیشدیر.  

    

  -      ندن و نئجه سینیرلانمیش؟ 

   

  -      سوسیال دویغولار، ایجتیمای و اخلاقی اؤلچولر و ان نهایت بیزیم حیات سیستئمیمیزی کونترول ائدن عاغیل طرفیندن اینستینکتلر، ایچ دورتولر سینیرلانار. ائروتیزمین ائیتیمله ایلگیلی اولدوغونو دا اونوتماماق گره کی ر. ائییتیمسیز ائروتیزمین سونو یاخشی اولماز. ائیتیمسیز توپلوملاردا ائروتیزم تابویا دؤنوشر و ادبیییتی اؤز کونترولو آلتینا آلار، ائروتیک درینلیگی اولان شعرلر یازیلماز. تابولارین حاکیم اولدوغو و ائروتیک مؤوزولارا یاساق قویولان اؤلکهلرده، موسلمان اؤلکهلرده اولدوغو کیمی اخلاقسیزلیق باش آلیب گئدر. موسلمان اؤلکهلرینده اولان فاحیشه لیگین یوزده بیری آزاد آوروپا اؤلکهلرینده یوخدور. چونکو ائروتیزمین اؤنونه انگل چیخدیغیندا او، کندیلیگیندن تهلوکه لی بیر دورتو اولاراق داها ایره لیلره سیچرار. بعضی دیللرین ائروتیک درینلیکدن محروم اولمالاری نین سببی بو یاساقلار و تابولاردیر، دیلین اؤز دوغاسینداکی نؤقسان سؤز قونوسو دئییل. لایک و دئموکراتیک اؤلکهلرده و قادینا اؤزگور اینسان کیمی باخان آنایاسالاردا ائروتیزم بیر یاشام ایمکانی کیمی اورتایا چیخاراق شعرده اؤز یانسیماسینی تاپار، آنجاق دینی دیکتاتورلوقلا یؤنتیلن اؤلکهلرده بو ایمکانلار سؤندورولر، شعر قیسیرلاشار. بو تابولارلا ساریلمیش موسلمان اؤلکهلرینده دوشونن گنجلری اؤز وطنلرینده درین پسیخولوژی سیخینتی و سارسینتی یاشارلار.     

   

  -      خالق کولتورونده بونون نومونه لری ایله قارشیلاشماق اولارمی؟ 

   

  -      خالق کولتورونده بونون آشیری شکیللری ایله قارشیلاشماق مومکوندور. آنجاق خالق دیلینده یایقین اولان بعضی دئییملرده ائروتیزمین فلسفه سی و تاریخی ایله ده قارشیلاشماق مومکوندور. یونق آلمان دیلیندن “هر آدمین ایچینده بیر حوا و هر حوانین ایچینده بیر آدم وار” دئیه بیر آتا سؤزونو آچیقلایاراق اؤز آنیما (کیشی روحونداکی دیشی) و آنیموس (قادین روحونداکی ائرکک) قاوراملارینی آچیقلار. اصلینده منه گؤره تؤوراتدا کئچن یارادیلیش داستانی دا ائله بوندان عیبارتدیر. یعنی آدم یاتدیغی یئرده اونون قابیرغاسینی چیخاریب حوانی یاراتمامیشلار. بونلار میفیک ایفاده لردیر. بونلار دین دیلی ایله آچیقلانان رمزلردیر. یارادیلیش داستانینداکی آچیقلاما هر کیشی نین ایچینده بیر قادین و هر قادی نین ایچینده بیر ائرکگین اولدوغونو دین دیلی ایله آنلاتمیشدیر. بونون علمی و صنعت دیلی ایضاحی اولمالیدیر. سادجه آتالار سؤزونده دئییل، بشر تاریخینده لطیفه لرده ده ائروتیزم و سئکس مؤوزوسو گؤرونموشدور. بوتون خالقلاردا اوچ مؤوزو اطرافیندا گولدورولر و لطیفه لر دوزلدیلمیشدیر: دین، قؤوملر، سئکس. بو اوچ مؤوزو اطرافیندا اینسانلیق تاریخن گولمه لی سؤزلر دوزلدیب گولوشه رک سترئس آتمیشدیر. تاریخده بلکه ده سئکس، دین و قؤوملرله ایلگیلی گولمه لی لطیفه بیلمه یهن اینسان تاپیلماز. چونکو هر اوچو ده گئرچکدن چوخ سیرلی مؤوزودور.   

   

   

  -      بیزیم ادبیاتیمیزدا ائروتیزم مثله سینه گلک. کلاسیک ادبیاتیمیزدا ائروتیزم نومونه لری ایله قارشیلاشماق مومکوندورمو؟ 

   

  -      کلاسیک عیرفان ادبیاتی نین شعرلرینده ائروتیزم چوخ جیدی مؤوزولاردان بیری اولموشدور. دوداق، قادینلارین ممه سی، یاناق کیمی بدن ناهییه لری توخونوش هسرتینی و اؤپوجوک قوندورما دیلگینی ایفاده ائتمیشدیر. مؤولانا، جلالددین رومی، هافیز شیرازی، فوضولی، شهرییار و دیگر بؤیوک سؤز اوستالاریندا ائروتیزم چوخ نازیک، ائستئتیک و بزن ده چیلپاق شکلی ایله بیان ائدیلمیشدیر. مثلن هافیز شیرازی دئییر: 

  “قوجا اولسام دا، منی بیر گئجه سیخ قوینونا آل، 

  صاباح ائرکن یوخودان یئپیئنی بیر گنج اویانیم.”

گر چه پیرم تو شبی تنگ در آعوشم گیر

تا سحرگه ز کنار تو جوان بر خیزم

  مؤولانا آللاهلا سئویشمه سی حاقدا شعرلر یازمیش. فوضولیده ایسه ائروتیزم مؤحتشم اوسلوبلا بیان ائدیلمیشدیر. بیزیم دیلیمیز ائروتیزمه یاتقین دئییل سؤیله ینلرین فوضولینی یاخشیجا اوخومالاری گره کی ر. فوضولی عیرفانیندا ائروتیزم ده اینسانی دوغرویا و دوغرولوغا چاتدیران عامیل کیمی اورتایا چیخار. بونو ان ائستئتیک بیچیمده فوضولی بیر چوخ قزللرینده آنلاتمیشدیر. مثلن فوضولی بیر شعرینده دره لرده آخان سولارین ائروتیک و قادین بدنینه توخونما کیمی آماجی نین اولدوغونو بو شکیلده بیان ائدر: گؤزلریمیزین اؤنونده آخیب گئدن بو آرخین سویو وار یا؟ بو سو داغلارین آرخاسیندا بیر گؤزه لین نازیک بدنینه ساریلماق و اوندان ذؤوق آلماق اوچون تلسمکده دیر. بو آخار سویون باشیندا چیلپاق بیر قادین بدنینه توخونوش خیالی وار. داغین آرخاسیندا بو سودا یوییونماق اوچون بیر گؤزل بکله مکده دیر. آنجاق بو داغین آرخاسیندا او گؤزل یوخدور. بلکه اؤنده کی  دره ده، باشقا داغلارین آرخاسیندا او قادین اولار خیالی ایله دره ده کی  سو قوشار و جوشار گئدر. سونوندا داها بؤیوک و جوشقولو دوغرویا چاتار. دنیزین بوتونلوگو ایچینده اؤز وارلیغینی تانیملار. پارچانی آرارکن بوتونه قوووشار. کئچیجی ذؤوق پئشینده قوشارکن ابدی و آنلاملی موطلق ذؤوقون ایچینده یوخ اولار. بئلجه فوضولییه گؤره ائروتیزم حیاتیمیزدا بیر پارچا ایکن، بیزی بوتون اولانا چاتدیرار:  

  “سو کی، سرگردان گزر، باشیندا واردیر بیر هاوا 

  قالیبا بیر گول اوزون سروی-خورامانین سئور.” 

  فوضولی نین و دیگر عیرفان اهلی نین آچیقلادیقلاری کیمی بیر چوخ حاللاردا بوتونو آراما پارچانی یاشاماقلا مومکون اولار. پارچایا تمایول بوتونه دوغرو اوزانان یولون باشلانقیج نؤقته سی اولار. اینسانین بوتونه واریش یولچولوغوندا بو و فوضولی نین دیگر شعرلرینده گؤروندویو کیمی ائروتیزم ده حرکت وئریجی اونسور اولاراق اورتایا چیخار. یا دا فوضولی نین حامامدا چیمن قیزین بدنینی سؤزلرله تصویر ائتمه سی ائروتیزمین شعرده کی  یئری باخیمیندان چوخ ایلگی چکیجیدیر. فوضولی نین شعرلرینده دوغا ایله ائروتیک ایلیشکیلر گئنیش اؤلچوده اله آلینار. بیر قزه لینده چمنلیکده گزن قیزین آیاقلارینی یاشیل چمنلیگین اؤپه رک ذؤوق آلدیغینی، باییلدیغینی یازاراراق چیچکلرین قیزین بالدیرلاری و آیاقلارینا ائروتیک توخونوشو تصویر ائدر. عاشیقین ده او چیچکلر و چمنلر کیمی او گؤزه لین بالدیرلارینا و آیاقلارینا توخونوش خیالینی دیله گتیرر.: 

  “چمنده پایبوسیندن اولوبدور سبزه لر خوررم، 

  همن بیر سبزجه اولماغا عالمده یئتر عاشیق.” 

   

  -      شهرییار بیزیم دؤورده یاشامیش شاعیردیر و دیلی ده داها آنلاشیلاندیر. شهرییارین شعرلرینده ائروتیزم حاققیندا نه دئیه بیلرسینیز؟ 

   

  -      شهرییارین شعرلرینده ائروتیزم چوخ گئنیش ووسعتله یئر آلمیش. شاعیر طبیعتی ده دیشی اولاراق گؤرر. داغلارین کؤکسونده کی  تپه لری قادین ممه لری کیمی گؤرور. آز اؤنجه دئدیک کی، شاعیر نسنه لری و دوغانی دیشی اولاراق گؤرر. شهرییار دا قادین بدنینی طبیعته بنزه دهر. طبیعته توخونوشو قادین بدنینه توخونوش کیمی آچیقلار. داغلارین کؤکسونده آخان بولاقدان سو ایچمگی قادین ممه سینی اممک کیمی تصویر ائدر. شهرییارین ان شاه اثری “سهندیییه”دیر. چونکو بو اثرده وضعن، موسیقی، شعرین ایچ دوزه نی، سربست شعرله قافییه لی شعرلرین ایچ-ایچه گیرمه سی مؤحتشم بیر تصویر یارادیر. شهرییار بورادا قادی نین کمرندن بوغازینا طرف یوکسلن ناهییه نی تصویر ائدیر. گؤبک و سونرا کؤکسده کی  ایره لی گلن ایکی ممه. ندیر بو ممه لر؟ بیز چوجوقلوقدا او ممه لری امیب حیاتا گیریریک. گنجلشدیگیمیزده ده ایلگیمیزی ان چوخ چکن قیزلارین ممه لردیر. یئنه ده ممه لره اوداقلانار ائروتیک خیاللار. طبیعتی دیشی اولاراق گؤرن شهرییار دره نین دیبیندن زیروه یه دوغرو یوکسلن سهند داغینی تصویر ائدیر. تام بیر قادین بدنی کیمی و زیروه یه چاتمادان داغین کؤکسونده قادین ممه لرینه بنزه ین ایره لی چیخمیش کیچیک تپجیکلر وار. ممه لر قادین سینه سینده دیک اولاراق اؤنه چیخدیغی کیمی، تپه لرده داغین کؤکسونده تام ممه لر کیمی اؤنه چیخمیش. قادین ممه سیندن آخان حیات سویو کیمی، بو داغین کؤکسونده یئرلشن ممه لردن ده حیات سویو آخار، قادین ممه سینی امرجه سینه او سویو دا امه رک ذؤوق آلار، حیات دویغولاریمیزی جوشدوراریق. هم ده بو داغین کؤکسونده کی  ممه لر گنج و توخونولمامیش قیز ممه سی کیمی، “شوخ” ممه لر شکلینده تصویر ائدیلر: 

  “دؤشلرینده سونالار سینه سی تک شوخ ممه لرده، 

  نه شیرین چئشمه لرین وار! 

  او یاشیل تئللری یئل هؤرمه ده، 

  آینالی سحرده، 

  عیشوه لی ائشمه لرین وار.” 

  یا دا باشقا بیر شعرینده یئنه ده شهرییار طبیعتی دیشی گؤرمه خیالینی آچیقلار. موغان دوزلوگونو قادین سینه سینه بنزه دهر. بو دوزنلیکده ایکی قوزو یان-یانا یاتمیش. شهرییارین آغلار گؤزو بیری آرازین ساغیندا، بیری ده سولوندا اولان ایکی ممه آراسینداکی دوزنلیکده آراز چایینا دؤنوشموش: 

  “چوخلار اینجیکدی کی، سن اونلارا ناز ائیلمیسن، 

  من ده اینجیک کی، منیم نازیمی از ائیلمیسن. 

  سینه بیر دشتی-موغاندیر قوزو یان-یانا یاتیب، 

  منیم آغلار گؤزومو اوردا آراز ائیلمیسن...” 

   

  -      ازربایجان رئسپوبلیکاسی نین شاعیرلرینده بو تصویرلر وارمی؟ 

   

  -      واردیر. رامیز رؤوشه نین شعرلرینده درین ائروتیک دویغولار و دونیاگؤروشو وار. رؤوشه نین بیر چوخ شعرلرینده ایچیمیزه گؤمدویوموز، یاشایا بیلمه دیگیمیز ائروتیزمله قارشیلاشاریق. بیزی داها روحون داها اوست قاتلارینا یوکسلدن ائروتیزمله قارشیلاشاریق. مثلن بو پارچالارا دیقت ائدین: 

  “چیچکلر دوغولور بو یاز گئجه سی،  

  بو یاز گئجه سینده اؤلمه یه نه وار؟ 

  درسم گوللرینی بو گلن یازین، 

  ساللانیب یئللنسم بوداقلاریندان. 

  ائشیتسم آدیمی سئون بیر قیزین 

  هله اؤپولمه میش دوداقلاریندان 

  بو یاز گئجه سینده اؤلمه یه نه وار.  

  چیچکلر دوغولور بو یاز گئجه سی 

  پاریسده، تبریزده، حَیطیمیزده...” 

  بو میصراعلار باشدان سونا قدر سئوگی و ائروتیزمدیر. تبریز بیر ده بو شکیلده تصویر ائدیله رک سئویلمه لیدیر، سادجه قابا قهرمانلیق و اینقیلابی شعرلری ایله دئییل. تبریزده سئویشمه آزادلیغی اولدوغوندا و بو شکیلده چیچکلر اورادا آچدیغیندا اؤلکهمیز آزاد اولاجاق.  

   

  -      قادین شاعیرلرین شعرلرینده ائروتیزم نئجه بیان ائدیلمیشدیر؟ 

   

  -      قادینلار ایجتیماعی، مدنی و کولتورل حیاتا گئج گیردیکلریندن بوتون دونیا شعری نین بؤیوکلری کیشیلر اولموش. نسنه نی، وارلیغی و حیاتی دیشی اولاراق ایدراک ائتمیش، دویومسامیشلار. کیشیلر نسنه نی دیشی اولاراق گؤرمگی بیر صنعت کیمی گلیشدیرسه لر ده، قادینلارا دوشونن، ذؤوق آلان آزاد بیر اینسان کیمی باخمامیشلار. بو اوزدن قادینلار طرفیندن یازیلان اثرلرده قادینلیق حیسس اولمامیش، یا دا چوخ آز حیسس ائدیلمیشدیر. مهستی گنجوی نین روبایلرینده ائروتیزم قیسمن واردیر. اؤزللیکله اونون روبایلرینده قادین اولدوغو آچیقجا سئزیلمکده دیر. خیخ اسرین سونلارینا دوغرو طاهیره قوررتولئین شعرلرینده ائروتیک باخیش بوجاغی گلیشدیرمیشدی، اونو دا شیه-موللا-فئودال سینفی اؤلدوردو.  

   

  -      چاغداش شعر اؤرنکلرینده قادین شاعیرلر بو ایستیقامتده بیر ایش گؤرموشلرمی؟ 

   

  -      یراندا فوروغ فرروخزاد آدیندا چوخ اؤنملی بیر شاعیر خانیم اولموش. خخ اسرین اورتالاریندا بؤیوک اثرلر یازدی. آنجاق چوخ گنج اؤلدو. او، بؤیوک جسارتله شعرلرینده وارلیغی ائرکک کیمی گؤرمگی دیله گتیرمیشدیر. آیریجا، قادینلارین دا صیرف سئکس ماکینالاری اولمادیقلاری یولوندا موجادیله آپارمیشدیر. بیلیرسینیز هم کلاسیک دؤنمده، هم ده چاغیمیزا یاخین دؤنملرده شاعیرلرین آدی شعرین آلتیندا یازیلمازسا، مؤلیفین قادین اولدوغونو آنلاماریق. لاکین فوروغ فرروخزادین بوتون شعرلرینده آدی اولسون، یا دا اولماسین یازارین قادین اولدوغو آچیقجا سئزیلر. فوروغ فرروخزاد قادی نین ماجرا دولو بیر کیتاب اولدوغونو و ائرککلر ده بو کیتابین آنجاق سئکس آدلی صحیفه سینی اوخوماغا آشیری مئیللی اولدوقلارینی وورغولار، آنجاق بو کیتابین دیگر صحیفه لری ده اوخونمادیقجا قادی نین نئجه بیر وارلیق اولدوغو آنلاشیلمایاجاقدیر. بو دوشونجه سینی بیر دؤردلوگونده بو شکیلده بیان ائدر: 

  “منیم دوداغیمی اؤپوشلری نین،  

  یاخار آتشییله اؤپوب یاندیران. 

  بو سونسوز کیتابدیر آنجاق سن اوندان،  

  یالنیز بیر صحیفه  اوخویاجاقسان.” 

   

  -      مودئرن دونیادا قادین بدنی نین رئکلامی ائروتیزم آنلاییشی ایچینه گیررمی؟ 

   

  -      کاپیتالیزمین قادین بدنینی تیجارت نسنسی اولاراق قوللانماسی دوغال و شعرین مینیللر بویونجا تصویر ائتدیگی ائروتیزمله علاقه لی دئییلدیر. کاپیتالیزمین قادین بدنینی تیجارت نسنسی اولاراق قوللانماسی ایله کور-کورانه تؤره لرین و دین آنلاییشلاری نین قادین حیاتینا یوکلله دیکلری جهالت و آشیری سینیرلامالار عئینی شئیدیر. ایکیسینده ده قادینی آزاد اینسان اولاراق قبول ائدیلمز. کاپیتالیزمین نسنلشدیریب کیملیکسیزلشدیردیگی قادین وارلیغی کیمی، قادی نین داش-قالاق ائدیلدیگی اؤلکهلرده ده نه سئوگی، نه ده ائروتیزم کیمی اینجه دویغولار اوزرینه دوغرو بیلگی الده ائتمک اولار. پورنوقرافی نین ائروتیزمله علاقه سی یوخدور. ائروتیزم گئرچک حیاتدا آلینان ذؤوق دئییل، خیالین و روحون ذؤوق آلما بیچیمیدیر. بو اوزدن اونون مئتافیزیکسل طرفی ده واردیر. شعری ده بیزه جاذیبهلی قیلان بودور، شعر بیزه مئتافیزیکسل ائروتیک دویغولارین هززینی یاشادار.